নিউজ ডেক্স, ১৭ অক্টোবৰঃ
ভাৰতৰ উচ্চতম ন্যায়ালয়ত সলনি হ’ল ‘Lady Of Justice’ৰ প্ৰতিমূৰ্তি।ভাৰতৰ উচ্চতম ন্যায়ালয়ত নতুনকৈ উন্মোচন কৰা লেডী জাষ্টিছৰ মূৰ্তিটোৱে ঔপনিৱেশিক পৰম্পৰাৰ পৰা আধুনিক মূল্যবোধলৈ পৰিৱৰ্তনৰ প্ৰতীক, সাংবিধানিক ন্যায়, সজাগতা, আৰু অন্তৰ্ভুক্তিৰ ওপৰত গুৰুত্ব আৰোপ কৰে।
‘অন্ধ কানুন’বুলি অভিহিত কৰা ন্যায়ৰ দেৱীৰ এতিয়া পৰা সলনি হ’ব। চকুৰ কাপোৰ আৰু তৰোৱালৰ ঠাইত সংবিধান থাকিব। সাধাৰণতে নিৰপেক্ষতাৰ প্ৰতীক হোৱা চকুৰ পতা আঁতৰাই দিয়া হৈছে আৰু ভাৰতীয় সংবিধানে প্ৰতিমূৰ্তিটোৰ বাওঁহাতত থকা তৰোৱালখনৰ ঠাই লৈছে।দেশৰ মুখ্য ন্যায়াধীশ ডি ৱাই চন্দ্ৰচুদৰ নেতৃত্বত এয়া দেশৰ ন্যায়ালয়ৰ এক উল্লেখযোগ্য পৰিৱৰ্তন ।
উচ্চতম ন্যায়ালয়ৰ ন্যায়াধীশৰ পুথিভঁৰালত অৱস্থিত এই প্ৰতিমূৰ্তিটোৱে মুখ্য ন্যায়াধীশ ডি ৱাই চন্দ্ৰচুদৰ নিৰ্দেশত সলনি কৰা হয়। এই প্ৰতিমূৰ্তিটোৰ লক্ষ্য হৈছে ভাৰতৰ ন্যায় অন্ধ নহয় কিন্তু সকলোকে সমানে দেখে, আনহাতে নতুন সাজ-পোছাকে ভাৰতীয় পৰম্পৰাৰ সৈতে গভীৰ সংযোগৰ ওপৰত আলোকপাত কৰিছে।
সকলো নাগৰিকৰ বাবে আদালতৰ দুৱাৰ মুকলি আৰু সমান দৃষ্টিভংগীক বুজাবলৈ চকুৰ পতাখন আঁতৰাই পেলোৱা হৈছে যদিও মূৰ্তিটোৰ সোঁহাতত থকা ন্যায়ৰ পাল্লাখন ধৰি ৰখা হৈছে, যিয়ে দুয়োপক্ষৰ যুক্তিৰ ওজন কৰাৰ সময়ত আদালতে বজাই ৰখা ভাৰসাম্যৰ প্ৰতীক
হিচাপে থাকিব।
এই পদক্ষেপক সাংবিধানিক মূল্যবোধত শিপাই থকা ভাৰতীয় পৰিচয়ৰ সপক্ষে ব্ৰিটিছ ঔপনিৱেশিক যুগৰ প্ৰতীক এৰি থৈ ন্যায়পালিকাক আধুনিকীকৰণৰ দৃষ্টিভংগীৰ অংশ হিচাপে ব্যাখ্যা কৰা হৈছে।
