ৰাম জন্মভূমিত চুৰিকাণ্ড!হেৰাল অযোধ্যাৰ ভক্তিপথ আৰু ৰাম পথত ব্যৱহাৰ কৰা লাইট, প্ৰজেক্টৰ

নিউজ ডেক্স, ১৪ আগষ্টঃ
ৰাম মন্দিৰৰ নিৰ্মাণৰ কাম এতিয়াও শেষ হোৱা নাই। কাম শেষ নৌহওঁতেই আৰম্ভ হৈছে চুৰি। যিটো শুনি সকলোৱে আচৰিত হৈছে। চৰকাৰে ৰাম মন্দিৰপাবলৈ অত্যাধুনিক সুবিধাৰে সজ্জিত তিনিটা পথ নিৰ্মাণ কৰিছিল। যাৰ ভিতৰত আছে আটাইতকৈ দীঘল ৰাম পথ, দ্বিতীয় জন্মভূমি পথ আৰু তৃতীয় ভক্তি পথ। এই সকলোবোৰ পথত উচ্চ-প্ৰযুক্তিৰ পোহৰো স্থাপন কৰা হৈছিল। বিশেষ কথাটো হ’ল ৰাম পথৰ কাষৰ গছবোৰত পোহৰ দিয়া হৈছিল যাতে ভগৱান ৰামৰ চহৰ অযোধ্যাৰ নিশাও ভক্তজনে দিনৰ দৰে অনুভৱ কৰে।
ফেব্ৰুৱাৰী মাহত, ভগৱান ৰামলালাক অযোধ্যা ৰাম মন্দিৰত পবিত্ৰ কৰা হৈছিল। এই সময়ছোৱাত, ভক্তি পথ আৰু ৰামপথত ৰাম মন্দিৰলৈ যোৱা হাজাৰ হাজাৰ বাঁহেৰে কাৰুকাৰ্য কৰা লাইট আৰু ৯৬টা প্রজেক্টৰ স্থাপন কৰা হৈছিল। কিন্তু, এতিয়া ইয়াৰে আধাতকৈও অধিক লাইট চুৰি হৈছে। আৰক্ষী সূত্ৰই প্ৰকাশ কৰামতে, ৩৮০০ টা বাঁহেৰে কাম কৰা লাইট আৰু ৩৬টা প্রজেক্টৰ এতিয়ালৈকে চুৰি হৈছে। যাৰ বজাৰমূল্য প্রায় ৫০ লাখ টকাতকৈয়ো বেছি। অযোধ্যা উন্নয়ন কৰ্তৃপক্ষৰ সৈতে চুক্তিবদ্ধ হোৱা যশ এণ্টাৰপ্ৰাইজেছ আৰু কৃষ্ণা অটোমোবাইল কোম্পানীয়ে আৰক্ষী থানাত অজ্ঞাত ব্যক্তিৰ বিৰুদ্ধে চুৰিৰ গোচৰ ৰুজু কৰিছে।